لست جميلة قصه جديده كامله بقلم سوليه نصار

!!
انت كداب أنا مش حلوة ...أنا وأنت واهلي عارفين كده كويس بس بتحاولوا تكدبوا علي نفسكم قبل ما تكدبوا عليا ...
ربع ايديه وقال
وانا هكدب عليكي ليه إن شاء الله وهتجوزك ليه لو مش عجباني ...
رديت من غير تفكير 
عشان شفقان عليا ..
ضحك وهو بيحط أيده علي وشه وقال
انتي مصدقة اللي بتقوليه يا أنوار هعمل اللي عملته ده كله عشان بس شفقان عليكي ...
مسك وشي وقال 
قولتها وهقولها دايما ...هقولها دلوقتي وبكرة وفي كل وقت يا أنوار...أنا بحبك ...بحبك جدا كمان ...وبحب شكلك وملامحك وصوتك حتي غباءك بحبه ...ارتاحتي دلوقتي ...
هزيت راسي وانا بحضنه طبطب عليا وقال 
قوليلي بقا مين اللي زعلك بالشكل ده ...مين اللي قالك الكلام الفارغ ده ...
بلعت ريقي بس طبعا رفضت اطلع والدته قدامه وحشة وقولت
مفيش بس لما شوفت البنات الحلوين النهاردة صعبت عليا ...
ابتسم وقال 
بس أنا مشوفتش غيرك انتي
غمضت عيني براحة ....عارفة اني هواجه كتير معاهم ...بس حب فارس اكيد هيخليني اصمد...عشان خاطره أنا مستعدة اعمل المستحيل ...
خلصت حفلة كتب الكتاب وكان الفرح بعد اسبوع ....
مر الاسبوع بسرعة بسبب التجهيزات ...فارس رغم مشاغله كان بيجيلي كل يوم ويكلمني ...كان مهتم بيا جدا ....رغم حبه الكبير بس الخۏف اللي في قلبي مخلصش ...كنت حاسة أن في يوم هيزهق مني ويمشي ....
جه قبل يوم الفرح وجات حماتي تتكلم معايا ...
قعدت معاها في الجنينة بتاعتنا وانا متوترة ...
اتفضلي اشربي النسكافيه يا طنط ...فارس حكالي أن حضرتك بتحبيه بالطريقة دي ....
بصتلي هي من فوق لتحت وقالت
مليش نفس يا حبيبتي ...أنا جاية اديكي حاجة وامشي ....
أتوترت وفركت كفي وقولت
اتفضلي يا طنط ...
رفعت رأسها وقالت
اللي يحصل ده يبقي بيننا بلاش تصغري عقلك ماشي ...
أتوترت اكتر فكملت هي 
لما سالت فارس هتروحي انهي بيوتي سنتر قال انك حابة تعملي ميكب بسيط يوم الفرح وقال أن واحدة قريبتك هي اللي هتعمله ...
ابتسمت وقولت 
ايوة يا طنط أنا طلبت كده ..أنا مش بحب الميكب التقيل وشايفة أن
كل دي تكاليف ملهاش لازمة ...
وليه يا حبيبتي شايفانا بنشحت ...أنا هوديكي اكبر بيوتي سنتر في مصر ...متزعليش مني انتي جمالك متواضع جدا وابني ما شاء الله جماله مغطي عليكي ولا انتي عايزة الناس تعيب عليكي مينفعش لازم نحافظ علي وضعنا قدام الناس !!!!
يتبع
لست_جميلة
الثالثة
حابب اعرف ليه غيرتي رأيك !
قالها فارس بهدوء وهو بيبص لعيوني اللي بتتهرب منه ...ارتبكت ومقدرتش اتكلم للمرة التانية واقول علي اللي عملته والدته فقولت
عايزة ابقي جميلة في اليوم ده يا فارس ايه مليش حق !
ليكي حق طبعا يا حبيبي بس مستغرب طلبك فجأة انتي كنتي مصممة تعملي ميكب بسيط ليه غيرتي رأيك فجأة !
ابتسمت ليه وانا بحاول معيطش وقولت
فكرت يا حبيبي وقولت اني افضل اروح بيوتي سنتر كبير دي يوم في العمر وعايزة اظهر جميلة 
اتنهد وقرب مني ومسك ايدي وقال 
انوار بجد ده قرارك ...يعني متأكدة عايزة تروحي من نفسك ولا حد قالك كده ...
مش فاهمة. ..
قولتها وانا بستهبل عليه فراح بصلي بصة كأنه مسكني وانا مذنبة وقال
انوار قولي الحقيقة ماما لما جاتلك النهاردة قالتلك حاجة تضايقك ...قولي الحقيقة ...
بلعت ريقي وانا بهز راسي وبقول 
ابدا يا حبيبي ...مامتك كانت لطيفة معايا اووي ومضايقتنيش خالص بس أنا غيرت رأيي فيه مشكلة ابتسم وهو بيلعب في شعري وقال
لا يا حبيبتي اللي عايزاه اعمليه المهم تكوني مبسوطة ...
وبعدين باسني علي راسي ومشي ....
اتنهدت وانا بقعد علي الانتريه وانا حاسه قلبي بيتعصر من الألم