قصتنا تشبة بعضنا شيقة جدا ستعجبكم

-ومش جايز يكون مش هو
-مش هتخسري حاجه لو جربتي
-هخسر كتير اوي،مشاعر،دموع،طاقه
-ليه بتقدري البلا قبل وقوعه
-عشان اللي مريت بيه مكانش هين أبدًا
-للدرجادي خوفك مانعك بالرغم من كل الكلام الكويس اللي اتقال عن يوسف ؟؟
ضحكت بسخرية وانا ببص قدامي:
-طب ما الاتنين اللي كنت مخطوبالهم قبل ما اعرف يونس الناس قالت عليهم كلام كويس،طب ما يونس كل الناس كانت بتشكر في أخلاقه
في الآخر خطيبي الاولاني اكتشفت أن أخلاقه زي الزفت بيشتمني دايما،بيشك فيا،والتاني كان بارد ومشاعره زي لوح التلج،وعمره ما حسسني اني بنت حلوه زي باقي البنات وبخيل ومعندهوش شخصيه،ويونس لحد قبل الفرح بيوم كان محسسني انه ميقدرش يعيش من غيري وفي الآخر سابني عشان بيحب واحده تانيه

-وياتري انتي حبيتي مين فيهم ؟
هزيت راسي بدموع:
-يونس طبعا
-لسه بتحبيه رغم كل اللى عمله فيكي
-للاسف يالمار قلبي مش قادر يكرهه
-مبينسيش شخص غير شخص تاني وانتي بنفسك ….
ضحكت وانا بقاطعها:
-انا اللي كنت بقول كده في رواياتي عارفه
-مش جايز يبقي يوسف ده العوض اللي ربنا شايلهولك
-خايفه يالمار،خايفه اوافق واتخطب ليوسف ويقدر ينسيني يونس ويخليني احبه وبعدها يسيبني لاي سبب من الأسباب وارجع لنقطه الصفر من تاني،وقتها عمري ما هرجع زي زمان أبدًا
مسكت ايدي وهي بتضغط عليها بابتسامه مطمنه:
-مش انتي طول عمرك بتتفألي بسوره يوسف

-ايوه بحبها اوي
-عشان هي في آخرها جبر صح
-صح
-يبقي توافقي علي يوسف لأن ده العوض اللي ربنا كاتبهولك
رديت بتوتر وامل جوايا:
-تفتكري
-طبعا
-ت تمام

ردت بفرحه:
-اروح ابلغ بابا ياخد من يوسف معاد
هزيت راسي وانا بتنهد وبغمض عيني براحه غريبه

يوم الخميس
في تمام السادسه مساءً
كنت واقفه قدام المرايه بضيف لمساتي الآخيره لشكلي
كنت لابسه فستان تايجر واسع،وطرحه سودا وشوذ اسود،حاطه ميك اب رقيق وهادي
بصيت لشكلي في المرايه
كنت مرتبكه بشكل غريب !
بالرغم انها مش المره الاولي اللي هقابل فيها عريس لكنها كانت المره الوحيده اللي من كتر خوفي وتوتري اتمني الأرض تنشق وتبلعني

اخدت نفس عميق وانا بقول لنفسي:
-اهدي اهدي مفيش حاجه دي مجرد مقابله زي اي مقابله
في الوقت ده حضر صراع بين قلبي وعقلي
قلبي:
-تفتكري ده العوض
عقلي بسخريه:
-هه طموح اوي انت ياعم القلب كلهم زي بعض
قلبي بغيظ:

-اسكت انت،مفيش حد زي التاني أبدًا،في أشخاص كويسه
عقلي:
-متتعشمش انك تقابل أشخاص كويسه في رحلتك،كل واحد مؤذي بطريقه مختلفه
قلبي بتوتر:
-ب بس يوسف كويس انا متأكد أنه مش هيأذيني
-إيمان انتي لسه مجهزتيش
فوقت من شرودي والصراع اللي داير ما بين اتنين عكس بعض نهائيًا
عقلي اوقات بيكون منطقي وبيتغلب علي قلبي
لكن اوقات تانيه مشاعري بتتغلب وبتخرس صوت العقل

بلعت ريقي وانا برد بتوتر:
-ج جهزت
لمار وهي بتقرب مني بابتسامه:
-شكلك حلو اوي
-بجد؟
-طبعا
ابتسمت ابتسامه مهزوزه وانا بمسك ايديها تعبيرًا عن الامتنان وأنها مسابتنيش لحظه واحده في عز حزني وضعفي وخوفي اللي مبينتهيش
-ربنا يخليكي ليا
اخدتني في حضنها وهي بتبوس راسي:

-ويخليكي ليا ويعوضك خير يارب
رفعت راسي لفوق وانا بدعي من كل قلبي:
-يارب